#ဝိုင်ဖိုင်ဖရီး😂
ဦးဖိုးရွှေသည် ပင်စင်ယူပြီးသည့်နောက်ပိုင်းတွင် သမီးအငယ်ဆုံးလည်းဖြစ်၊ အချစ်ဆုံးလည်းဖြစ်သော ကျောင်းဆရာမ ဒေါ်ထွေးနှင့်အတူနေထိုင်လေသည်။
သူ့တွင်သားသမီးသုံးယောက်ရှိသည်၊ ဇနီးဖြစ်သူဆုံးပါးပြီးနောက်ပိုင်းတွင် အိမ်ထောင်မပြုတော့ဘဲ ဖခင်တာဝန်အပြင် မိခင်တာဝန်ကိုပါကျေပွန်စွာထမ်းဆောင်ခဲ့သည်။
သားကြီးကဆရာဝန်ဖြစ်ပြီးသားလတ်ကအင်ဂျင်နီယာဖြစ်ကာ အိမ်ထောင်အသီးသီးကျကုန်သည်၊ နယ်မြို့များတွင်တာဝန်ထမ်းဆောင်နေကြသောကြောင့် သာကြောင်းမာကြောင်းများကို နေ့စဉ်ဗွီဒီယိုကောခေါ်ကာဆက်သွယ်စကားပြောလေ့ရှိ၏။
ဦးဖိုးရွှေသည် နေ့စဉ်လိုင်းပေါ်တွင်သာအချိန်ကုန်တတ်သည်၊ မိုးလင်းသည်နှင့်ဖေ့ဘုတ်ဖွင့်ကာ Good morning ပုံလေးတွေတင်ပြီး လိုင်းပေါ်ကမိတ်ဆွေများကိုနှုတ်ဆက်သည်၊ ဘုရားပုံတော်လေးတွေတင်ကာ သာဓုခေါ်ခိုင်းသည်၊ ပြီးလျှင် စမြူထဲသို့ဝင် ကာ မိမိကြိုက်နှစ်သက်သောတေးသီချင်းလေးများကို ဟစ်ကြွေးသီဆိုကာ အပန်းဖြေလေ့ရှိသည်၊ မိမိသီဆိုထားသော သီချင်းလေးများနားဆင်ကာ မိတ်ဆွေများလည်း နားဆင်နိုင်ရန် ဖေ့စ်ဘုတ်ပေါ်သို့တင်လေ့ရှိသည်၊ လိုက်,ရှယ်, ကွန်မန့်လေးတွေကြည့်ပြီး..ပြန်ရေးကာကြည်နူးနေတတ်၏။
သမီးအပျိုကြီးက တရားဘာဝနာတွေကို အားထုတ်ဖို့ပြောလေတိုင်း...
"ဘုရားတရားဆိုတာ.. ရင်ထဲမှာရှိနေဖို့က အရေးကြီးကြောင်း" အမြဲပြန်ပြောလေ့ရှိသည်၊ နောက်ပိုင်းတွင် သမီးလုပ်သူက အဖေစိတ်ချမ်းသာရင် ပြီးရောဆိုကာ လွှတ်ထားလိုက်သည်။
တနေ့တွင် သမီးဖြစ်သူအလုပ်တွင်ရှိနေခိုက်...ဦးဖိုးရွှေအိမ်အောက်သို့အဆင်းမှာ ရုတ်တရက် မူးဝေပြီး သတိလစ်ကာ လဲကျသွားသည်၊ အရပ်ကောင်းမှု့ကြောင့်ဆေးရုံသို့ရောက်ရှိခဲ့ရသည်။
သမီးဖြစ်သူရောက်ရှိလာသောအခါ ဦးဖိုးရွှေသည် သတိပြန်လည်လာခဲ့သည်၊ ဆရာဝန်စစ်ဆေးချက်အရ..ဆီးချို၊သွေးတိုးနှင့်နှလုံးရောဂါဖြစ်ချင်နေသည်။
သမီးဖြစ်သူကိုတွေ့သောအခါ...
"သမီး"
"ပြောလေအဖေ..သမီးအနားမှာရှိပါတယ်"
"အဖေ့ဖုန်းပါလား"
"သမီးကျောင်းကနေ တန်းလာတာ..မပါဘူးအဖေ"
"ဒါဆို..သမီးဖုန်းနဲ့ အဖေ့ကိုဓါတ်ပုံရိုက်ပေးပါလား...လိုင်းပေါ်ကမိတ်ဆွေတွေအသိပေးပြီး..မစိုးရိမ်ကြဖို့ ပြောချင်လို့ပါ"
သမီးလုပ်သူကအဖေ့အကြောင်းသိသူပီပီ..ဘာမှပြန်မပြောတော့ဘဲ..ဖခင်ကျေနပ်စေရန် ပုံစံအမျိုးမျိုးရိုက်ပေးလိုက်သည်။
"အဖေ့ကျန်းမာရေးကို ဂရုစိုက်အုံးအဖေ" သမီးလုပ်သူကမဝံ့မရဲ သူမအဖေကိုပြောလိုက်သည်၊ အဲဒီတော့မှ ဦးဖိုးရွှေဟာ..ငါသေသွားရင်ဆိုတဲ့အသိလေးပေါ်လာသည်၊ မျက်စေ့စုံမှိတ်ကာ စဉ်းစားပြီး..
ဘုရားကိုအာရုံပြုကြည့်သည်..
ဖေ့စ်ဘုတ်ကြီးပေါ်လာသည်..
တရားကိုအာရုံပြုကြည့်သည်..
စမြူထဲရောက်သွားကာသီချင်းသံတွေကြားယောင်လာသည်
သံဃာကိုအာရုံပြုကြည့်သည်..
လိုက်တွေ..ကွန်မတ်တွေပေါ်လာပြန်သည်
ဦးဖိုးရွှေတော်တော်လန့်သွားသည်..ထို့နောက်မထူးဇာတ်ခင်းကာ..သမီးကိုခေါ်လိုက်သည်..
"သမီး"
"ဘာလည်းအဖေ...ဘာလိုချင်လို့လည်း"
"သမီးကို တခုလောက်တောင်းဆိုချင်လို့"
"ပြောပါအဖေ"
"ဒီလိုပါသမီး..တကယ်လို့အဖေသေသွားခဲ့ရင်..အဖေ့အုပ်ဂူနားမှာ စမတ်ဖုန်းလေးတလုံးနဲ့ ဖရီးဝိုင်ဖိုင်လေးတခုလောက်တပ်ဆင်ပေးပါလားကွယ်...မိတ်ဆွေတွေနဲ့အဆက်မပြတ်ဖို့နဲ့ နောက်ပြီး..သရဲလည်းကြောက်တတ်လို့ပါနော်..
သမီးဖြစ်သူမှာ ဘာစကားမှမပြောနိုင်တော့ဘဲ..ပါးစပ်ဟက အံ့ဩကုန်နိုင်ဖွယ် ဖြစ်နေပါတော့သည်။😂😂😂
😂သင်းချို😂
မူရင်းအားခရက်ဒစ်ပေးပါတယ် 😊
Comments
Post a Comment